আইন অনুসৰি এজন ব্যক্তিয়ে ঘৰত কিমান নগদ ধন ৰাখিব পাৰে ?

 

ৰাজনৈতিক নেতা বা উদ্যোগপতিৰ ঘৰত আয়কৰ বিভাগ, চিবিআই বা ইডিৰ অভিযান। ঘৰৰ পৰা উদ্ধাৰ কোটি কোটি টকা! বিগত কেইবছৰমানৰ ভিতৰত এনে দৃশ্য সাধাৰণ লোকে বাৰে বাৰে দেখিছে। ফলত স্বাভাৱিকতে এটা প্রশ্ন উত্থাপিত হৈছে। আইন অনুসৰি এজন ব্যক্তিয়ে ঘৰত কিমান নগদ ধন ৰাখিব পাৰে? দেশৰ আয়কৰ আইনে এই বিষয়ে কি কয়?

ঘৰত নগদ ধন ৰখাৰ বিষয়ে বহুতৰে ভুল ধাৰণা আছে। কিন্তু আয়কৰ আইন অনুসৰি, এই বিষয়ত কোনো উচ্চ সীমা নাই। অর্থাৎ, এজন ব্যক্তিয়ে যিমান ইচ্ছা ধন নিজৰ কাষত বা ঘৰত ৰাখিব পাৰে। কিন্তু সেই ধনৰ উৎস বৈধ হ'ব লাগিব। সংশ্লিষ্ট ব্যক্তিৰ আয়কৰ ৰিটাৰ্ণৰ তথ্যত এই ধনৰ উল্লেখ থাকিব লাগিব। যদি তেনে নহয়, তেন্তে ঘৰত থকা নগদ ধনক আয় বহির্ভূত বুলি গণ্য কৰিব পাৰে আয়কৰ বিভাগ বা ইডিয়ে।

ভাৰতীয় নাগৰিকৰ লগত থকা নগদ ধনৰ বিষয়টো আয়কৰ আইনৰ ৬৮ৰ পৰা ৬৯বি ধাৰাত ব্যাখ্যা কৰা হৈছে। কোনো ব্যক্তি বা প্ৰতিষ্ঠানৰ লগত আয় বহির্ভূত নগদ ধনৰ সন্ধান পোৱা গ'লে চৰকাৰে তৎক্ষণাত জৰিমনা আৰোপ কৰিব পাৰে। এনে ক্ষেত্ৰত আয়কৰ বিষয়াসকলে সেই ব্যক্তিৰ মুঠ আয়ৰ ৭৮ শতাংশ পর্যন্ত জৰিমনা আৰোপ কৰাৰ অধিকাৰ ৰাখে। ইয়াৰ উপৰি, সংশ্লিষ্ট বিভাগে তেওঁক গ্ৰেপ্তাৰো কৰিব পাৰে।

আইনগতভাৱে কোনো সর্বোচ্চ সীমা নাথাকিলেও, কোনো ব্যক্তিৰ কাষত প্ৰচুৰ পৰিমাণৰ নগদ ধন থাকিলে সন্দেহৰ সৃষ্টি হ'ব পাৰে। সেই ক্ষেত্ৰত ধনৰ উৎস প্ৰমাণ কৰিবলৈ তেওঁক প্রয়োজনীয় নথিপত্র লগত ৰাখিব লাগিব। এই নথিপত্ৰৰ ভিতৰত আয়কৰ ৰিটাৰ্ণৰ উপৰি ব্যৱসায়িক হিচাপ, শ্বেয়াৰৰ পৰা আয় বা অন্যান্য আয় সম্পর্কীয় নথিও থাকিব লাগিব।

পাকিস্তানৰ গুলীত শ্বহীদ হ’ল ভাৰতৰ বীৰ জোৱান মহম্মদ ইমতিয়াজ।

 পাকিস্তানৰ গুলীত শ্বহীদ হ’ল ভাৰতৰ বীৰ জোৱান মহম্মদ ইমতিয়াজ।

বিএছএফ জোৱানগৰাকীৰ আত্মবলিদানক শ্ৰদ্ধা জনাইছে ভাৰতবৰ্ষই।

সীমান্ত সুৰক্ষা বাহিনী (BSF)ৰ এগৰাকী জ্যেষ্ঠ বিষয়াই জনোৱা মতে, উপ-পৰিদৰ্শক মহম্মদ ইমতিয়াজে সন্মুখৰ পৰা সাহসেৰে নেতৃত্ব দিছিল অভিযানৰ।

ভাৰত-পাকিস্তানৰ যুদ্ধৰ মাজত নোসোমায় চীন-আমেৰিকা

 ডিজিটেল ডেস্ক: পহলগামত সন্ত্ৰাসবাদীৰ আক্ৰমণটোৰ প্ৰত্যুত্তৰ দি ভাৰতে কৰা আক্রমণে পাকিস্তানৰ বাবে জটিল পৰিস্থিতিৰ সৃষ্টি কৰিছে। এই সন্ধিক্ষণত দেশখনে আশাৰে বাট চাই থকা বন্ধু দেশে এতিয়া লগ এৰা দিবলৈ লৈছে। উল্লেখযোগ্য যে পাকিস্তানৰ প্ৰধান ভৰসা আছিল চীন, কিন্তু দেশখনে পাকিস্তানক মুকলিকৈ সমর্থন কৰা নাই।

উল্লেখযোগ্য যে ভাৰতৰ বিৰুদ্ধে পাকিস্তানৰ অন্যতম শক্তি আছিল চীনে দিয়া কেইবা কোটি টকা ব্যয় সাপেক্ষ জে এফ-১৭ বিমানখন। এই বিমানখনেই বৃহস্পতিবাৰে ভাৰতৰ আক্ৰমণত ধ্বংসপ্রাপ্ত হয়।

ইয়াৰ পাছত শুকুৰবাৰে চীনৰ বিদেশ বিভাগে দিয়া মন্তব্যই পাকিস্তানক বিব্রত কৰে। চীনৰ বিদেশ মন্ত্ৰ্যালয়ৰ মুখপাত্র লিন জিয়ানে কয় যে চীনে কোনো কাৰণতে সন্ত্ৰাসবাদক সমর্থন নকৰে। তেওঁ লগতে কয় যে ভাৰত-পাকিস্তানৰ যুদ্ধক লৈ চীনৰ স্থিতি ইতিমধ্যে স্পষ্ট কৰা হৈছে। জিয়ানে কয়, 'শেহতীয়া পৰিস্থিতিক লৈ চীনে উদ্বেগ প্রকাশ কৰিছে। ভাৰত আৰুপাকিস্তান উভয়ে পৰস্পৰৰ চুবুৰীয়া ৰাষ্ট্ৰ। দুয়োখন দেশ চীনৰো চুবুৰীয়া। চীনে সকলো ধৰণৰ সন্ত্ৰাসবাদৰ বিৰোধিতা কৰে।' তেওঁ লগতে কয়, 'বৃহত্তৰ স্বাৰ্থৰ খাটিৰত উভয় পক্ষকে শান্তি আৰু স্থায়িত্ব, ৰাষ্ট্ৰসংঘৰ চাৰ্টাৰকে ধৰি আন্তঃৰাষ্ট্ৰীয় নিময় মানি চলিবলৈ আৰু পৰিস্থিতিয়ে অধিক জটিল ৰূপ ল'ব পৰা কাৰ্যৰ পৰা আঁতৰি থাকিবলৈ আহবান জনাইছোঁ।'

তেওঁ লগতে কয় যে বৰ্তমানৰ উত্তেজনা প্ৰশমনৰ কাৰণে চীন আন্তঃৰাষ্ট্ৰীয় সম্প্ৰদায়ৰ সৈতে এক গঠনমূলক ভূমিকা পালন কৰিবলৈ সাজু হৈ আছে। ইফালে, পাকিস্তান চৰকাৰৰ বাবে আন এক বিপর্যয়ৰ সৃষ্টি কৰে আমেৰিকাই। উল্লেখযোগ্য যে ভাৰতৰ সৈতে উত্তেজনাৰ সৃষ্টি হ'লে প্রায়ে পাকিস্তানে আমেৰিকাৰ ফালে সহায়ৰ আশাত চাই থাকে, কিন্তু এইবাৰ পৰিস্থিতি পূৰ্বৰ দৰে হৈ থকা নাই। চীনৰ দৰে আমেৰিকায়ো এইবাৰ সহায় কৰিবলৈ অস্বীকাৰ কৰে।

পাকিস্তানক সন্মানজনকভাৱে এই সংকটৰ পৰা মুক্ত কৰাৰ বিকল্প আমেৰিকাই এইবাৰ বন্ধ ৰাখিছে। আমেৰিকাৰ উপ-ৰাষ্ট্ৰপতি জে ডি ভেন্সে স্পষ্টভাৱে ভাৰত আৰু পাকিস্তানৰ যুদ্ধৰ মাজত সোমাবলৈ অস্বীকাৰ কৰে। তেওঁ বৃহস্পতিবাৰে ফক্স নিউজত দিয়া এটা সাক্ষাৎকাৰত কয়, 'আমি কৰিব পৰা কামটো হ'ল তেওঁলোকৰ মাজত চলি থকা উত্তেজনা হ্ৰাস কৰাৰ বাবে উৎসাহিত কৰাটো, কিন্তু আমি যুদ্ধৰ মাজত নোসোমাওঁগৈ, ইয়াত প্রকৃততে আমাৰ কোনো কাম নাই, ইয়াৰ লগত আমেৰিকাৰ কোনো ধৰণৰ লেনা-দেনা নাই।' আনহাতে, ৰিপাব্লিকান নেত্রী তথা আমেৰিকাৰ ৰাষ্ট্ৰপতি ড'নাল্ড ট্রাম্পৰ প্ৰাক্তন সহযোগী নিকি হেলীয়ে পহলগামৰ আক্ৰমণৰ পাছত ভাৰতৰ নিজকে সুৰক্ষা দিয়াৰ আৰু প্ৰত্যুত্তৰ দিয়াৰ অধিকাৰ আছে বুলি কয়।